Staðreyndir um iPhone

Vart hefur það farið framhjá nokkrum sem fylgist með nýjungum í tækniheiminum að Apple er að senda frá sér farsíma. Þrálátur orðrómur hefur verið um þessa tækninýjung í 2-3 ár og telja margir að þetta sé tæknibylting sem sé að eiga sér stað. En er það raunin?

Við nánari athugun kemur ýmislegt athyglisvert í ljós sem ef til vill gæti sett strik í reikninginn þegar það kemur að samanburði við aðra farsíma sem eru nú þegar á markaðnum. Nú þegar eru nokkur eintök af iPhone komin í umferð og hafa ýmsir aðilar komist í tækið til þess að staðfesta það hvað þessi blessaði sími býður upp á:

-Stýrikerfið í símanum, sem er í raun minni útgáfa af Mac OS X tekur heil 700MB í pláss á harða disknum
-Það er ekki hægt að afrita, klippa eða líma (copy, cut, paste) texta í símanum
-Enginn A2DP-stuðningur, þ.e. stereo-Bluetooth
-Ekki er hægt að nota tónlistina sem maður geymir í símanum sem hringitón fyrir símann, ekki er einu sinn hægt að setja hreinan MP3-tón inn í símann, einungis er hægt að nota þá hringitóna sem fylgja símanum
-Þegar síminn er tengdur við PC-tölvu, þá samstillir hann (sync) einungis dagatalið og heimilisfangaskrána (!)
-Hægt er að skoða, en ekki vinna með, ýmis skjöl eins og Word, Excel og PDF
-Flash-stuðningur er til staðar í símanum en vafrinn er ekki með Flash-stuðning og að auki er enginn video-afspilun studd í vafranum
-Hægt er að taka myndir en ekki myndskeið, þrátt fyrir að YouTube-aðgangur sé til staðar í símanum
-Ekki er hægt að senda MMS-skilaboð

Miðað við þessa lýsingu þá minnir þetta nokkuð mikið á þá síma sem voru að koma á markað í kringum aldamótin. Þrátt fyrir það virðast flestir telja að iPhone sé 'fullkomnasta símtæki sem komið hefur á markaðinn'. Einkennilegar fullyrðingar, svo ekki verður meira sagt. Hægt er að benda á aragrúa af símtækjum frá öllum helstu símaframleiðendunum sem jafnast á við iPhone og gott betur.

Hinsvegar er snertiskjárinn sem iPhone er með nokkuð nýstárlegur og athyglisvert verður að fylgjast með því hvernig fólk nær að venjast því að vinna einungis á snertiskjá.

Þetta æði sem hefur farið af stað varðandi iPhone hefur þó gert eitt markvert og það er að það hefur opnað augu almennra notenda fyrir því hvað sé hægt að gera með farsímanum sínum. Ef ég tala fyrir mína parta þá hef ég verið að ná í tölvupóstinn minn í símanum mínum síðan 2000 og farið á Netið að auki, ég hef notast við MP3-spilarann í símanum þegar ég þarf að hlusta á tónlist þegar ég er úti að hjóla eða labba í vinnuna. Þessvegna er það fagnaðarefni að Apple skuli hella sér út í þennan bransa og opna augu fólks fyrir því hvað farsímar geta gert. Hinsvegar tel ég að allir viti bornir menn sjái það að iPhone er langt frá því að vera sú tæknibylting sem um er talað, sú bylting hófst í kringum aldamótin, það er bara núna fyrst sem fólk er að átta sig á henni.

iPhone nýtist enn ekki á Íslandi